Алтынньы 4 күнүгэр Мэҥэ Хаҥалас улууһун киин балыыһатыгар Улуу Кыайыы 75 сылын көрсө, доруобуйа харыстабылын сайдыытыгар кылааттарын киллэрсибит бэтэрээннэргэ анаан «Кинилэринэн киэн туттабыт» стеланы үөрүүлээхтик арыйдылар. Эһиил оройуоҥҥа 1920 с. бастакы балыыһа Бүтэйдээххэ аһыллыбыта 120 сыла бэлиэтэнэр. Маннык бэлиэ тэрээһиннэр чэрчилэринэн доруобуйа харыстабылын устуоруйатын төрүттээччилэрин ааттарын-суолларын үйэтитэр сыаллаах-соруктаах стеланы оҥорууга 30 бэтэрээн оҕолорун, сиэннэрин кылааттара киллэрилиннэ. Хас биирдиилэрин мэтириэтэ, олорбут сыллара, үлэлээбиттэрэ, туох ааты-суолу ылбыттарын аһаҕас мусуой курдук билсэр кыахтанныбыт. Ол курдук, сэрии кыттыылаахтара Иван Иванович Бубякин, Тимофей Егорович Сосин, Гаврил Гаврильевич Петров, Дмитрий Ефимович Захаров, Петр Аламподистович Пивоваров, тыыл, үлэ бэтэрээннэрэ Татьяна Парфеньевна Дмитриева, Иван Афанасьевич Васильев, Ирина Матвеевна Малиновская, Родион Алексеевич Петров, Евдокия Ильинична Попова, Анна Михайловна Зыкова, Николай Алексеевич Сидоров, Антонина Леонидовна Михайлова, Фекла Павловна Пивоварова, Василий Федорович Иванов, Аркадий Саввич Чемпосов, Евдокия Ивановна Сосина, Лира Ивановна Михайлова, Михаил Алексеевич Марсанов, Василий Михайлович Макаров, Егор Дмитриевич Григорьев, Иван Николаевич Николаев, Лидия Ефремовна Ефремова, Марфа Семеновна Гоголева, Любовь Васильевна Яковлева, Гликерия Григорьевна Корнилова, Ким Анисимович Скрябин, Людмила Васильевна Яковлева, Иван Николаевич Семенов, Светлана Афанасьевна Чичахова ааттара-суоллара үйэ-саас тухары сурулунна. Гранит тааска мэтириэттэрэ дьүһүйэн оҥоһуллубут баараҕай стеланы арыйыы сиэригэр-туомугар Анна Климентова алгыстаата. Стеланы оройуон кылаабынай бырааһа Алексей Павлов, бырайыагы көҕүлээччи Евдокия Борисова, доруобуйа харыстабылын үлэһиттэрин боропсойууһун бэрэссэдээтэлэ Зинаида Ксенофонтова, ССРС доруобуйа харыстабылыгар туйгуна, акушер-гинеколог Егор Григорьев уола Андрей Григорьев итиэннэ эдэр быраастар Семен Сенин, Мария Неустроева ытыс тыаһынан арыйдылар. СӨ Ил Түмэнин дьокутаата Андрей Находкин эҕэрдэлээн: «Биһиги балыыһабыт үлэһиттэрэ актыыбынай кэлэктииптээхтэр. Култуура уонна успуорт эстэпиэтэтигэр, аахсыйаларга, күрэхтэһиилэргэ, уопсастыбаннай үлэҕэ инники күөҥҥэ сылдьалларын бэлиэтии көрөбүт. Биир чаҕылхай холобуру көрдөрөн, өрөспүүбүлүкэҕэ биир бастакынан бүтүн мемориальнай комплексы тэрийдигит. Аҕа дойдуларын көмүскээбит уонна ыарахан кэмнэргэ сыралаһан, суураллыбат кылааттарын киллэрсибит аҕа дьоммутугар үйэлээх бэлэҕинэн буолла. Ким да умнуллубат, туох да умнуллубат. Сайда, киэркэйэ турар Майаҕа бу түөлбэҕэ биир кэрэ көстүүлээх комплекс буоллун», ‒ диэтэ. СӨ Доруобуйа харыстабылыгар министиэристибэтин медицинскэй өҥө хаачыстыбатын хонтуруоллуур департаменын салайааччыта Дьулустаан Чичахов: «Үөрүүлээх түгэҥҥэ кэлэн турарбынан үөрэбин, Майаҕа төрөөбүтүм-үөскээбитим, ийэм киин балыыһаҕа өр сылларга үлэлээбитэ. Өйдөбүнньүк стела инники көлүөнэҕэ кэскиллээх дьыала быһыытынан сыаналанар. Үлэлээн ааспыт уонна билиҥҥи көлүөнэлэргэ ыкса сибээс үөскээбитэ устуоруйаҕа суолталаах дии саныыбын. Онон министиэристибэ салалтатын аатыттан кытаанах доруобуйаны, норуот доруобуйатын харыстабылыгар кыһамньылаах үлэни баҕарабын», ‒ диэн туран бэлиэ наҕарааданы туттарда. Салгыы улуус кылаабынай бырааһа Алексей Павлов, Майа сэлиэнньэтин дьокутааттарын сэбиэтин бэрэссэдээтэлэ Павел Судико о.д.а. эҕэрдэлээтилэр. Бэтэрээннэр оҕолорун, сиэннэрин ааттарыттан харда тылы терапевт бырааһынан үлэлээбит, «Бочуот знага» уордьаннаах, СӨ доруобуйа харыстабылыгар туйгуна, Бочуот кинигэтигэр киллэриллибит Лира Ивановна Михайлова кыыһа, Алдан оройуонун киин балыыһатын кылаабынай бырааһын амбулаторнай-поликлиническай көмөҕө солбуйааччыта, СӨ доруобуйа харыстабылыгар туйгуна Надежда Скрябина эттэ уонна Евдокия Семеновнаҕа дьиэ кэргэнин аатыттан харчынан көмөтүн туттарда. СӨ үтүөлээх бырааһа Евдокия Борисова үөрүүлээх күнүнэн эҕэрдэлээн туран, стелаҕа киллэриллибит бэтэрээннэр оҕолорун, сиэннэрин хас биирдиилэрин ааттарын ааттаан ыҥыртаата итиэннэ өйөбүл буолбуттарыгар махтанна.